Slæm hugmynd að reka Hönnu og Sigríði

Stundum gerir fólk ótrúlega furðulega hluti.

Nýráðinn dagskrárstjóri rásar 1 Þröstur Helgason ákvað nýlega að reka Hönnu G. Sigurðardóttur og Sigríði Stephensen, án viðunandi skýringa.

Guðmundur A. Thorsson ræddi þetta í Fréttablaðinu (að reka konur) í morgun.

Á dögunum voru tvær reyndar og snjallar útvarpskonur, Hanna G. Sigurðardóttir og Sigríður Stephensen, reknar frá Ríkisútvarpinu eftir langt og farsælt starf af Þresti Helgasyni, tiltölulega nýráðnum dagskrárstjóra Rásar eitt á RÚV. Hann hefur ekki rökstutt brottreksturinn en sagði einhvers staðar að hann gæti ekki tjáð sig um málefni einstakra starfsmanna; gefur þar með til kynna tillitsemi við þær brottreknu, lætur liggja að því að eitthvað kunni að vera við störf þeirra að athuga – sem ekkert bendir til að sé satt.
Maður á ekki að reka fólk nema það geri eitthvað af sér eða standi sig illa; það er ekki dyggð að reka fólk.

Hanna og Sigríður er frábærir útvarpsmenn og hafa þjóðinni mikið að færa.

Hanna er einnig öflugur starfsmaður útvarpsins, eins og sást á niðurskurðartímunum 2012-2013. DV fjallaði um ræðu hennar á samstöðufundi starfsfólks. Þar sagði Hanna:

síðustu viku gripu stjórnendur aftur til aðgerða. Enn harkalegri en fyrr. 60 starfsmenn. Út frá forsendum fjárlagafrumvarps sem enn hefur ekki verið samþykkt, ekki einu sinni komið til annarrar umræðu.

Hafi þessar síðustu aðgerðir engu að síður verið óhjákvæmilegar, vakna spurningar um hvar þær koma aðallega niður. Harðast á Rás 1. Þar fækkar um 12 manns þegar allt er talið. Um það bil helming starfsmanna. Tónlistardeildin er rústir einar, 1 og 1/2 stöðugildi eftir í þáttagerð, eitt til viðbótar í yfirumsjón. Og jóladagskráin í vinnslu, dagskrá sem að stórum hluta stendur saman af tónlist - hún er í uppnámi. -Einum af þremur þulum hent út samstundis, á tíma þegar mest mæðir á þessum starfsmönnum; annar fylgir í kjölfarið um áramót. -Átta störf á fréttastofu, Kastljósið lemstrað með uppsögnum fjögurrra starfsmanna, fjórum sagt upp á Rás 2, afmælisrásinni. Barnaefni heyrir líklega sögunni til í útvarpi um áramót, með uppsögn umsjónarkvennanna tveggja. Þannig mætti áfram telja. Brottreknir allir í hópi þeirra sem koma beint að vinnslu og útsendingu dagskrárinnar.

Engum sagt upp í yfirstjórn, millistjórnendur varðir, markaðsdeildin svo til óhreyfð. Er þetta eðlileg forgangsröð þurfi á annað borð að fara í aðgerðir? Hver er sýnin?

Spurningin á ennþá við, hver er sýn yfirstjórnar Rúv, ef hún lætur svona góða útvarpsmenn fara fyrir lítið.

Mæði og visna og upphaf lentiveirurannsókna

Í nýjasta hefti Náttúrufræðingsins (1.-2. hefti, 85. árg.) er grein eftir Halldór Þormar, sem fjallar um mæði og visnu sjúkdómana í sauðfé, og upphaf rannsókna á lentiveirum.

Halldór tók þátt í þessum rannsóknum eftir að Björn Sigurðsson réð hann til Tilraunastöðvar Háskóla Íslands í meinafræði að Keldum. Björn og félagar höfðu rannsakað sjúkdóma í sauðfé, sem borist höfðu hingað til lands með innfluttum kindum.

Ágrip greinarinnar.

Þessi grein fjallar um rannsóknir á sauðfjársjúkdómunum mæði og visnu á Íslandi laust eftir miðbik seinustu aldar en þær rannsóknir urðu kveikjan að kenningu Björns Sigurðssonar um hæggenga smitsjúkdóma sem vöktu heimsathygli á þeim tíma. Einnig verður greint frá rannsóknum á veirunni sem veldur þessum sjúkdómum, sem var nefnd mæði-visnuveira. Hún reyndist skyld æxlisveirum í hænsnum og músum, sem voru seinna flokkaðar sem retróveirur. Mæði-visnuveiran var flokkuð í undirflokk retróveira, sem ollu ekki æxlisvexti, og var nefndur lentiveirur með tilvísan til þess að þær valda hæggengum sjúkdómum, en lentus merkir hægur á latínu. Þegar veira ræktaðist frá alnæmissjúklingum laust eftir 1980 kom í ljós að hún var lentiveira, náskyld mæði-visnuveiru. Alnæmi reyndist vera hæggengur smitsjúkdómur samkvæmt skilgreiningu Björns Sigurðssonar.

Greinin er ljómandi skemmtileg aflestrar, eins og búast má við, og mjög fróðleg. Þessi kapituli í vísindasögu Íslands er einn sá glæstasti.

Ég hvet alla til að kaupa Náttúrufræðinginn og lesa grein Halldórs amk. Frekar nasasjón af viðfangsefninu má fá af fyrirlestri Halldórs, sem haldinn var í janúar síðastliðinn í fyrirlestrar röðinni Vísindi á mannamáli - Mæði-visnuveirur í sauðfé og tengslin við alnæmi.

Mynd er af veirusýktum heilagróðri.