Risa sporðdreki úr forneskju

Vísindamenn við háskólann í Bristol fundu nýlega steingerðar leifar sporðdreka sem var uppi fyrir um 390 milljónum ára. Þetta væri ekki frásögur færandi, þar sem skordýr og ættingjar þeirra eru stærstu hópar lífvera á plánetunni, nema hvað kvikindið óvernju stórt.

Fundist hafa steingerfðar leifar af nokkrum stórum hryggleysingjum, t.d. fjölfætlum og sporðdrekum, en enginn sem slagar í Jaekelopterus rhenaniae. 

Það ber að taka fram að ekki fannst heilt sýni af tegund þessari, en stærðin (250 cm) er metin útfrá stærð klóarinnar (46 cm), sem er fjarri því að vera fullkomin aðferð. Stærð og lögun líffæra, og sérstaklega munnparta og útlima, þróast oft hratt, þannig að vissan vara ber að hafa á þessu mati á stærð kvikindisins.

Leiddar eru líkur að því að J. rhenaniae hafi búið í sjó, og að e.t.v. hafi hærri styrkur á súrefni í lofti og láði gert tegundinni kleift að stækka svona umfram ættingja sína. Það er náttúrulega bara tilgáta sem erfitt er að prófa.

Athugasemdir

[Púkinn, 21.11.2007 kl. 17:25]

Merkileg þessi risakvikindi á þessum tíma.   Það er svona eins og vígbúnaðarkapphlaup hafi verið í gangi, þar sem helsta strategían var að verða stærri en andstæðingarnir.

[Arnar Pálsson, 22.11.2007 kl. 11:08]

Púki

Vígbúnaðarkapphlaup er einmitt ein af þeim tilgátum sem settar eru fram til að útskýra stærðina. Önnur tilgáta er að hryggdýrin, fyrstu fiskarnir t.d., hafi síðan orðið topp-rándýr í keðjunni, og leitt til útdauða þessara stóru hryggleysingja (Ímyndið ykkur bara steikurnar, humar sneiðar á stærð við vísundaöxl!) 

[Púkinn, 22.11.2007 kl. 15:34]

namm...