Framhald um þunglyndislyf og lyfjarisa

Kompás, fréttaþáttur stöðvar tvö mun í kvöld 19 janúar 2009 fjalla um þunglyndislyf og óvönduð vinnubrögð lyfjarisans Glaxo Smith Kline við kynningu á SSRi lyfjunum svokölluðu. Sjá auglýsingu á heimasíðu þáttarins á visir.is. Við bentum áður á pistil eftir Steindór J. Erlingsson sem tíundaði stöðu þessara mála. 

Af gefinni ástæðu er rétt að árétta tvennt. Í fyrsta lagi, þótt lyfjarisarnir séu uppvísir að óvönduðum vinnubrögðum og í sumum tilfellum hreinum lygum, þá þýðir það ekki að öll lyf séu ónothæf. Í öðru lagi, þá virkar hin vísindalega aðferð til þess að blása burt skýjaborgum og tálsýnum sem slíkir framleiðendur setja stundum upp í kringum VÖRUR sínar (rétt eins og hún nýtist til að slá botninn úr tunnum nýaldarsinna og snákaolíusölufólks).

Krafan hlýtur að vera að eftirlitskerfin verndi neytandann, ekki bara framleiðandann eða kaupsýslumanninn.

Athugasemdir

[Arnar Pálsson, 23.1.2009 kl. 11:38]

Í framhaldi má geta þess að Steindór hefur skrifað landlækni bréf og beðið hann um að koma í veg fyrir að misvísandi bæklingum frá GSK sé dreift af heilbrigðisstarfsmönnum. Bréfið í heild sinni er aðgengilegt á:

http://www.raunvis.hi.is/~steindor/LL.html