Arfleifð Darwins: tilboð í bóksölu stúdenta

Maður er nú ekki alveg með á nótunum, þrátt fyrir að vera í ritnefndinni. Ég var að frétta að bókin um Arfleifð Darwins væri ennþá á tilboði í Bóksölu stúdenta. Úr inngangi:

Rannsóknir á þróun eru raunvísindi. Því hefur verið haldið fram að þróunarkenningin sé ekki prófanleg, því að hún staðhæfi að lífið hafi orðið til einu sinni á jörðinni og að slíkar sögulegar staðhæfingar sé ekki hægt að prófa eða afsanna. Þetta er misskilningur. Þróunarkenning Darwins er samsett úr fjölmörgum prófanlegum tilgátum sem fjalla t.d. um byggingu þróunartrésins, náttúrulegt val, tilurð aðlagana og áhrif annarra krafta. Um ástæður þróunar, byggingu þróunartrésins og breytingar, t.d. í steingervingasögu, má setja fram tilgátur sem hægt er bæði að styðja og hafna. Þróunarkenningin hefur staðist öll próf, og því má tala um hana sem staðreynd. [skáletrun AP]

Sjá einnig fésbókarsíðu Arfleifðar Darwins. Síða helguð bókinni er í einhverju ólagi, en hægt er að lesa kafla Steindórs á síðu hans.

Athugasemdir

[Jóhann (IP-tala skráð) 9.12.2010 kl. 18:58]

Rannsóknir á þróun eru raunvísindi. Því hefur verið haldið fram að þróunarkenningin sé ekki prófanleg, því að hún staðhæfi að lífið hafi orðið til einu sinni á jörðinni og að slíkar sögulegar staðhæfingar sé ekki hægt að prófa eða afsanna. Þetta er misskilningur.

Misskilningur? Er ekki rétt að flestir líffræðingar aðhyllast þessa skýringu? Hún er ekki prófanleg. 

Hins vegar langar mig að spyrja þig, að því gefnu að gjörvallt líf á jörðu sé sprottið upp af einum meiði; Verkaði náttúrulegt val á þessa einu og fyrstu lífveru?

[Arnar, 10.12.2010 kl. 11:07]

Gott quotemine Jóhann með misskilningin, svarið við þessari spurningu þinni kemur í næstu tveim settningum sem þú quotaðir ekki.

[Arnar Pálsson, 10.12.2010 kl. 17:00]

Jóhann, þú settir puttann á ágætann punkt.

Hvenær byrjar lögmál þróunar að virka? Lögmál stofnerfðafræðinnar og þróunar fjalla öll um stofna, og ein lífvera getur ekki verið stofn. Þannig að fyrsta lífveran getur tæplega hafa virkað á fyrsta einstaklinginn. En um leið og þeir urðu tveir eða fleiri fór þróun að gerast, alveg vélrænt.

Hins vegar vitum við að náttúrulegt val virkar á fleira en lífverur, t.d. er hægt að hagnýta það til að þróa tölvuforrit ("in silico" og án vitrænnar hönnunar).

En þar sem við vitum ekki hvernig fyrsta lífveran var uppbyggð er dálítið erfitt að spá alvarlega í þessa spurningu. Sumir hafa fært rök fyrir því að það hafi ekki verið ein eiginleg lífvera í upphafi, bara efnaskiptaferli sem kepptu sín á milli um hráefni og orku, eða eftirmyndunarkerfi sem fjölfölduðu sjálfan sig. Hvorutveggja gæti þróast vegna náttúrulegs vals (ef fyrir hendi væri, i) breytileiki, ii) erfðir og iii) mishröð æxlun). Þannig að jafnvel áður en "frumeinstaklingurinn" varð til, hefðu lögmál þróunar mótað grunneiningar hans (ath, kyn og kynæxlun þróaðist seinna).