Málstofa og erindi um sjófugla við Ísland

Umhverfisráðaneytið og Náttúrufræðistofnun Íslands stendur fyrir Málstofu um sjófugla við Ísland fimmtudaginn 31. mars 2011. Ræða á:

ástand og þróun helstu stofna sjófugla við landið, hvernig loftslags- og umhverfisbreytingar hugsanlega virka á stofnana og umhverfi þeirra og hvernig bregðast megi við slíkum breytingum.

Málstofan er haldin á Hótel Sögu í sal Harvard II, kl. 13:00 til 17:00. Hólmfríður Arnardóttir, framkvæmdastjóri Fuglaverndar, er fundarstjóri. 

Dagskrá fundarins er eftirfarandi:

• 13:00. Setning, Svandís Svavarsdóttir umhverfisráðherra.
• 13:10. Sjófuglastofnar við Ísland - inngangur. Arnþór Garðarsson prófessor Háskóla Íslands.
• 13:40. Loftslagsbreytingar og hlýnun sjávar. Halldór Björnsson Veðurstofu Íslands.
• 14:00. Hvaða áhrif gæti hlýnun haft á lífríki sjávar við Ísland og á nálægum svæðum. Hjálmar Vilhjálmsson fiskifræðingur.
• 14:20. Fæða stærstu stofna íslenskra sjófugla. Kristján Lilliendahl, Hafrannsóknastofnun.
• 14:40. Stofnrannsóknir á lunda, hlýnun sjávar og sjálfbærni veiða. Erpur S. Hansen Náttúrustofu Suðurlands.
• 15:00. Kaffi.
• 15:20. Vetrarstöðvar íslenskra bjargfugla. Guðmundur A. Guðmundsson,  Náttúrufræðistofnun Íslands
• 15:40. Vöktun sjófugla og annarra mikilvægra fuglastofna. Kristinn H. Skarphéðinsson Náttúrufræðistofnun Íslands.
• 16:00   Mögulegar aðgerðir – umræða.
• 17:00   Fundarslit.

Arnþór Garðarsson heldur einnig föstudagsfyrirlestur Líffræðistofnunar 1. apríl næstkomandi. Hann er prófessor emeritus við Líf og umhverfisvísindadeild HÍ. Hann hefur aðallega stundað rannsóknir á vistfræði fugla, samspili fugla og vatnaskordýra við Mývatn og sveiflur í sjófuglastofnum. Arnþór hefur einnig þróað aðferðir til að áætla þéttleika fugla úr lofti sem nýtast við rannsóknir á sjófuglastofnum. Ágrip erindis:

Menn hafa frá örófi alda sótt að ströndinni og stundað veiðar á fiskum, sjávarskjaldbökum, sjófuglum og sjávarspendýrum. Þessi sókn leiddi til fækkunar og útdauða stofna og tegunda í takt við lögmál framboðs og eftirspurnar. Röskun af völdum þessara strandveiða var veruleg hér á landi en um 25% af öllum sjófuglum í Norðaustur-Atlanrshafi á heima á Íslandi, og hér eru nokkrar stærstu sjófuglabyggðir heims. Í þessu erindi verður fjallað almennt um sjófuglastofna, áhrif þeirra á vistkerfi strandarinnar og áhrif manna á tilvist sjófugla.

Föstudagfyrirlestrar Líffræðistofnunar eru öllum opnir með húsrúm leyfir og eru fluttir á íslensku (nema annað sé tekið fram). Þeir eru haldnir í stofu 131 í Öskju, náttúrufræðahúsi HÍ (kl 12:30-13:10).

Athugasemdir

[Þórir Kjartansson, 29.3.2011 kl. 18:12]

Samkvæmt dagskrá fundarins á fimmtudaginn virðast menn allir því að hlýnun sjávar eigi alla sök á óförum sjófuglanna hér við land á undanförnum árum.  Arnþór Garðarsson gæti hinsvegar komið eitthvað inn á það sem málið snýst um:  Rányrkjuna í uppsjávarveiðunum undangengin ár.   Vonandi verður einhver til að spyrja þessa fræðinga út í það.

[Arnar Pálsson, 30.3.2011 kl. 13:10]

Þórir

Ég held að þú sért að oftúlka lykilspurningar fundarins "hvernig loftslags- og umhverfisbreytingar hugsanlega virka á stofnana og umhverfi þeirra", en sannarlega mætti velta upp fleiri mögulegum útskýringum. Það fer líklega eftir efnistökum einstakra fyrirlesara, líklegast er að Kristján Lilliendahl kæmi inn á það sem þú telur eiga einhverja (alla?) sök á óförum sjófuglanna.