Á leið í framhaldsnám

Atli Harðarson aðstoðarskólastjóri við fjölbrautarskóla Vesturlands benti á að, 

það vita allir nokkurn vegin hvað bankamenn gera, en hafa afar óljósa hugmynd um hvað raunvísindamenn gera, flestir unglingar þekkja þessi störf lítið. Sjá pistilinn Raunvísindi og líffræði

Nám í líffræði við HÍ er kjörin leið til að kynnast því hvernig það er að stunda vísindalegar rannsóknir. Ekki er verra að M.S. gráða í lífvísindum eða skyldum greinum og sérstaklega birtar vísindagreinar, opnar fólki leiðir í framhaldsnám erlendis. Þetta var leiðin sem mín út. 

Það frábært tækifæri að fá að læra og starfa í bestu háskólum heims, kannski í iðandi stórborg eða spennandi háskólabæ. Nýverið komst Sara Sigurbjörnsdóttir líffræðingur inn í doktorsnám við sameindalíffræðistofnun Evrópu (EMBL). Hún fær að kynnast Heidelberg, einni af elstu og merkilegustu háskólaborg Evrópu.

Hún vann tvisvar í lottóinu, því hún fær að rannsaka þroskun og starfsemi gena í magnaðri tilraunalífveru, ávaxtaflugunni.

Fjallað var um þetta í fréttabréfi Verk og náttúruvísindasviðs HÍ.

Sara Sigurbjörnsdóttir, MS- nemi í líffræði við Líf- og umhverfisvísindadeild hlaut á dögunum fullan styrk doktorsnáms við EMBL í Heidelberg í Þýskalandi. EMBL er
skammstöfun á Sameindalíffræðistofnun Evrópu (European Molecular Biology Laboratory). EMBL er með starfsemi á fjórum stöðum í Evrópu og koma starfsmenn víðs vegar að úr heiminum. Innan EMBL eru nokkrar mismunandi rannsóknadeildir þar sem boðið er upp á skammtímaverkefni (t.d. sérverkefni í grunnnámi), doktorsnám, nýdoktorastöður (postdoc), hópstjórastöður sem og afbragðsaðstöðu fyrir rannsóknafólk sem kemur til skemmri tíma í heimsóknir.

Hægt er að sækja um á vef Rannís

Þeir sem lokið hafa eins til tveggja ára rannsóknatengdu framhaldsnámi eftir BS- próf (MS eða fjórða árs verkefni) sameindalíffræði, lífefnafræði, efnafræði, eðlisfræði eða
skyldum greinum, geta sótt um doktorsnám hjá EMBL. Nemendur, sem teknir eru inn í námið, fá framfærslustyrk á meðan á námi stendur. Öll aðstaða er til fyrirmyndar, m.a. góð aðstaða fyrir fjölskyldufólk og leikskóli á staðnum. Tekið er á móti umsóknum á eftirfarandi sviðum:
• Sameindalíffræði (Molecular biology)
• Líffræði stórsameinda (Structural biology)
• Frumulíffræði (Cell biology)
• Tölulegri líffræði (Computational biology)

Athugasemdir

[Hólmfríður Pétursdóttir, 13.4.2010 kl. 17:35]

Go, frændi, go. Ekki veitir af að tala máli raungreina.

[Arnar Pálsson, 14.4.2010 kl. 08:12]

Takk fyrir hvatninguna kæra frænka.

Vitanlega vil ég veg raungreina sem mestan, en vonandi fer ég ekki út í "sýndargjörninga" og "einkavinavæðingu" til að "markaðssetja" þær.

Stofnfruman almáttuga forði mér frá slíkum örlögum.

[Hólmfríður Pétursdóttir, 14.4.2010 kl. 15:24]

Ekki gleyma skyldmennapotinu í upptalningu lastanna.