Tólfta djúpsjávarráðstefnan

Þessa daganna er 12. alþjóðlega djúpsjávarráðstefnan (12th International Deep-sea Biology Symposium) haldin hérlendis.

Viðfangsefni sjávarlíffræðinnar eru mörg og margvísleg. Eitt erfiðasta viðfangsefnið eru vistkerfi og lífverur djúpsjávarins. Þetta eru hinir síðustu ókönnuðu afkimar jarðar, botn sjávar, neðansjávargil og hverasvæði.

Myndirnar eru af vef ráðstefnunar - copyright.

Af vef Háskóla Íslands:

Hinar alþjóðlegu djúpsjávarráðstefnur eru meðal stærstu viðburða á sínu sviði. Á ráðstefnunni, sem er hin tólfta í röðinni, verða haldnir um 150 fyrirlestrar um hin fjölbreytilegu viðfangsefni sem djúpsjávarlíffræðingar fást við. Fjallað verður um fjölbreytileika lífvera í djúphöfunum, samfélagsgerð, útbreiðslu hryggleysingja og fiska, o.fl. Ennfremur verður fjallað ítarlega um djúpsjávarhverasvæði, en nýlega hafa fundist ný svæði víða í heiminum. Djúpsjávarkóralar eru víða undir álagi af völdum veiða og verða forvitnilegar rannsóknir um djúpsjávarkórala kynntar á ráðstefnunni.

Þar sem ráðstefnan er haldin í Öskju, þýðir það að við fáum að blanda geði við margvíslega líffræðinga, sem eru álíka fjölbreytilegir og lífverurnar sem þeir skoða.

Einn af gestum ráðstefnunar, Robert Carney - prófessor við Lousiana State University er sérfræðingur í botndýrum í Mexíkóflóa, ræddi við Guðjón Helgason fréttamann sjónvarps á þriðjudaginn. Hann segir að olíulekinn í flóanum sé mjög alvarlegur og ekki vitað hversu mikið tjónið er (Myndskeið fréttarinnar - óvíst um tjónið á botni Mexíkóflóa). Hluti úr texta fréttarinnar:

Carney segir mestu óvissuna vera um hvað gerist í djúpunum því olían flæði af hafsbotni á eins og hálfs kílómetra dýpi. Hún berist síðan upp á yfirborð sjávar og dreifi úr sér þar.

Robert Carney segir að ekki verið hægt að kanna tjónið á sjávarbotni fyrr en í fyrsta lagi í næsta mánuði enda sé það flókið ferli. Áherslan sé frekar á að stöðva lekann þessa stundina. Hann segir að enginn sérfræðinganna í djúpsjávarlíffræði á ráðstefnunni hér á landi hafi skoðað hafsbotninn í Mexíkóflóa.

Carney þykist viss um að á Íslandi hafi menn áhyggjur af Golfstraumnum og að komi að olían blandist Golfstraumnum og berist með honum út í Atlantshafið. Carney segir að því lengra sem menn séu frá upptökunum því lánsamari séu þeir. Örverur brjóti niður olíuna og hún gufi einnig upp.

Þótt hann bendi á að áhrifin af mengun í mexíkóflóa séu kannski ekki mikil hérlendis, er samt ALLT í lagi að læra örlítið af þessu slysi. Í fyrsta lagi er mikilvægt að hafa regluverk og eftirlit sem tryggja að fyrirtæki eyðileggi ekki náttúruna og þar með lifibrauði fjölda fólks.

Athugasemdir

[Hólmfríður Pétursdóttir, 10.6.2010 kl. 15:32]

Segðu. Það getur skipt sköpum að þeir sem eiga að koma til skjalanna, verði umhverfisslys hafi fyrir fram gert ráð fyrir því versta og ákveðið til hvaða ráðstafana á að grípa og í hvaða röð. Það á við um öll viðbrögð við öllum slysum og óhöppum. Síðan þarf að marg fara í gegn um ferlið og æfa það. o.s. frv.

Eins og viðbröðin á Mexicóflóa  birtast í fjölmiðlum, er ein og viðbrögðin hafi veriheldur handahófkennd og eins og verið sé að gera tilrani, sem hefði átt að vera búið að gera fyrir löngu.

Svo virðast viðbrögðin í landi vera í ótrúlega smáum stíl í þessu landi þar sem flest virðist annars vera svo stórt.

Það þarf ekki að taka það fram að ég tala bara sem áhugakona um umhverfisvernd og slysavarnir, en veit minna en ekkert um olíuvinnslu.

[Arnar Pálsson, 11.6.2010 kl. 13:03]

Sæl Hólmfríður

Ég er alveg sammála um að við þurfum að kortleggja hættuna af svona búskap, eins og öðrum mannana verkum. 

Umfjöllunin í amerísku miðlunum hefur verið mun ítarlegri en hér austan hafs, og fréttamenn hafa afhjúpað verulegan óþverra (annan en olíuna sjálfa). BP virðist vera rekið með hagnaðrvonina eina að leiðarljósi, og virðist ekki hika við að brjóta reglur um öryggi starfsmanna eða borholanna.

Vonandi fara þeir á hausinn og einhver ábyrgari fyrirtæki fylli þeirra skarð.

[Hólmfríður Pétursdóttir, 11.6.2010 kl. 18:57]

Sæll Arnar

Þakka þér fyrir svarið.

Hvar ætlar þú að finna ábyrgt olíufyrirtæki?

Mér hefur nú reyndar fundist yfirvöld þarna við flóann og alríkisstjórnin að Obama meðtöldum reyna allt hvað þeir geta að koma allri sök á BP sem er auðvelt. Bretar eru orðnir hræddir við áhersluna á Bresk tengsl.

Mér finnst að heimamenn hefðu átt að geta brugðist við af meira krafti og sent svo BP reikninginn.

Ég er ekki að bera blak af BP sem mér finnst að hafi gert vont verra með ýmsum aðgerðum sínum. En ég hef gaman af að bera saman bandarískan og breskan fréttaflutning af þessum atburði.

[Arnar Pálsson, 14.6.2010 kl. 11:26]

Sæl Hólmfríður

Olíufyrirtæki eru misábyrg, og ég held að það sé skynsamlegast að reyna að versla við þau sem eru ábyrgari en hin. Ef ég ætti að nefna eitthvað olíufyrirtæki sem mig grunar (engin gögn hér að baki), að sé ábyrgari en önnur, þá myndi ég nefna norska félagið Statoil.

Sammála um að yfirvöld hefðu átt að grípa sterkar inn í og senda síðan reikninginn.

Hef ekki lesið bresku pressuna að neinu ráði, en það er hætt við að hún litist af hagsmunum (eins og öll pressa!).