Um nýja strauma og stefnur innan þróunarfræðilegrar vistfræði

Dr. Skúli Skúlason flytur erindi á vegum Hins íslenska náttúrufræðifélags.  Erindið verður flutt í dag, mánudaginn 31. mars kl. 17:15 í stofu 132 í Öskju, Náttúrufræðihúsi Háskóla Íslands.  Aðgangur er öllum heimill og ókeypis.

Titill erindis Um nýja strauma og stefnur innan þróunarfræðilegrar vistfræði
Ágrip af erindi.

Þróunarfræðin leiðir saman margar greinar líffræðinnar. Á síðustu árum hefur átt sér stað mikilvæg tenging milli rannsókna í vistfræði, þróunarfræði og þroskunarfræði. Þetta felur í sér nýstárlega nágun á hvernig vistfræðilegar aðstæður geta stuðlað að náttúrulegu vali en jafnframt mótað þroskun svipgerða, samhliða því að svipgerðir geta haft áhrif á vistfræðilegar aðstæður. Samverkun þessara ferla getur skýrt hvers vegna þróun líffræðilegrar fjölbreytni getur verið bæði hröð og breytileg og hvernig samspil vistfræði og þroskunar lífvera er lykilatriði í þróun breytileika og myndun tegunda. Margar tegundir norðlægra ferkvatnsfiska mynda afbrigði sem nýta sér ólíkar fæðuauðlindir og búsvæði og í sumum tilfellum hafa nýjar tegundir myndast. Rannsóknir sýna að aðskilnaður samsvæða afbrigiða orsakast af rjúfandi náttúrulegu vali og að svipgerðirnar mótast í mismiklum mæli af erfða-, umhverfis-, og móðuráhrifum. Norðlægir ferskvatnsfiskar eru því afar hentugir til rannsókna á samspili vistfræði, þróunar og þroskunar lífvera. Í fyrirlestrinum verður þetta útskýrt nánar með fræðilegum skýringum og dæmum.

Athugasemdir

[Jón Þórhallsson, 31.3.2014 kl. 12:33]

Á að keppast við að svara einhverri spurningu?

[Arnar Pálsson, 31.3.2014 kl. 18:28]

Já, vísindin ganga út á að prófa tilgátur og finna þannig svör við ákveðnum spurningum.

[Jón Þórhallsson, 1.4.2014 kl. 09:51]

Hverjar gætu verið 3 brýnustu spurningarnar

sem að þetta náttúrufræðifélag myndi vilja fá svör við?

[Arnar Pálsson, 1.4.2014 kl. 17:45]

Sæll Jón

Það fer nú vitanlega eftir náttúrufræðingnum!

Ég veit að Skúli, svo við höldum okkur við það efni, hefur mestan áhuga á samspili vistfræðilegra, þróunarlegra og þroskunarlegra lögmála, t.d.

hefur móðir mikil áhrif á þroskun ungra ferskvatnsfiska?

eru ferskvatnsfiskar sveiganlegri við upphaf landnáms, en sjógönguættingjar þeirra?



geta tegundir sem eru mjög breytilegar verið ígildi nokkura ólikra tegunda, sem eru stöðugari í útliti eða háttum?