Stofnfrumur með köldu blóði

Stofnfrumur eru frumur sem skipta sér hægt og geta af sér nokkrar mismunandi gerðir frumna. Til dæmis geta stofnfrumur blóðsins myndað nokkrar mismunandi gerðir blóðfruma og geta framleitt meira af sumum gerður en öðrum í kjölfar boða frá líkamanum.

Margir hafa gert því skóna að vegna þess hversu ósérhæfðar stofnfrumur séu, eigi að vera hægt að endurforrita þær og nýta til að endurmynda iilla farnar frumur eða skaddaða vefi. Slíkir læknisfræðilegir möguleikar hafa verið margræddir, en í raun er notagildi slíkra fruma óstaðfest.

Þriðjudaginn 28 október mun Marc Peschanski  flytja erindi við Háskóla Íslands um tilraunir til nota stofnfrumur til að meðhöndla taugasjúkdóma. Erindi hans nefnist Human embryonic stem cells, a dual therapeutic tool for monogenic diseases affecting the brain og er á vegum GPMLS, miðstöðvar framhaldsnáms í lífvísindum við HÍ. 

Titill pistilsins er ónákvæmur, aðallega vegna þess hversu ofarlega mér í huga er þáttur Attenboroughs um skriðdýr er sýndur verður á Rúv í kvöld. Tilhlökkunin er slík að maður gæti freistast til að skála...í köldu blóði.

Athugasemdir

[Arnar Pálsson, 28.10.2008 kl. 11:36]

Stenst ekki mátið. Þátturinn í gær var hreint frábær. Einnig var gaman að sjá viðtal við Davíð í Kastljósi, þar sem hann svaraði lakari spurningum fréttamannsins af fáranlegri ró. "Ertu spenntur yfir því að dýrin skuli vera að hverfa?" Hefur fréttamaðurinn aldrei horft á þætti Attenboroughs?

Það var gaman að sjá kúluskít úr Mývatni á borði fræðimannsins, gott ef þetta er ekki útflutningsvara. Gælu"dýr" framtíðar.

[Haraldur Rafn Ingvason, 30.10.2008 kl. 00:04]

Kallinum var færður þessi kúluskítur að gjöf þegar hann var hér á landi fyrir nokkrum árum og áritaði bókina sína í Náttúrufræðistofu Kópavogs. Það var öldungis frábær uppákoma

[Arnar Pálsson, 30.10.2008 kl. 13:04]

Mér líður eins og ég sé 12 ára aftur að horfa á þessa þætti. Þriðjudagar voru helgidagar hjá mér á þessum aldri, alltaf hægt að sjá góða fræðsluþætti.

Held í alvöru að kúluskítur sé efnileg markaðsvara, það er allavega auðveldara að koma honum í glerkrukku en norðurljósum.