Arnar Pálsson

21.1.2009 | 14:50

Nálastungur og pílukast

Nýaldarfræði og óhefðbundnar lækningar eru sívinsælar, sem er traustur mælikvarði á ágæti þeirra og notagildi...hm. Ein slíkra aðferða er nálastungur, sem gengur út á að stinga nálum í líkama sjúklings með það að markmiði að lina þjáningar eins og mígreni. Oft er skírskotað til þeirrar staðreyndar að kínverskir nálastungumeistarar hafa stundað þessa iðn um árþúsundir og kortlagt staði á líkamanum sem heppilegast er í að stinga.

Sem líffræðingur veit ég að taugar liggja á ákveðnum stöðum í líkamanum, og með með opnum hug gæti maður ímyndað sér að nálum stungið í ákveðnar taugar leiði til þess að heilinn hætti að heyra boð frá öðrum taugum (sem eru kannski vegna klemmdra tauga eða bólgu í einhverjum vef).

En hvað segja vísindalegar rannsóknir? Ein tilraun var á þessa leið. Sjúklingum var raðað af handahófi í þrjá hópa. Einn hópur fékk enga meðhöndlun (viðmiðunarhópur). Í einstaklinga í öðrum hópnum var stungið nálum, á ákveðna staði sem skilgreindir hafa verið af kínverskum meisturum (kínverski-hópurinn). Nálum var einnig stungið í þá sem fylltu þriðja hópinn, nema hvað nálunum var stungið í þá hér og þar af handahófi (tilviljana-hópurinn). (Sjá mynd af the Guardian af manni með nálar í andliti).

acupuncture1

Í ljós kom að fólki í viðmiðunarhópnum leið verst, en hinum leið marktækt betur. En athyglisverða niðurstaðan er sú að það var engin munur á því hvort nálarnar lentu á skilgreindum stöðum eða var stungið í sjúklinginn af handahófi. Semsagt pílukast blindingja er jafngott 3000 ára kínverskum fræðum. (Einnig finna þeir til jákvæðra áhrifa sem halda að nál sé stungið í sig - þá er nálinni bara ýtt á húðina en ekki stungið í hana.)

Þessar niðurstöður er tölfræðilega marktækar og eru samhljóma í endurteknum tilraunum, eins og lýst er í nýlegri yfirlitsgrein frá Klaus Linde og félögum við Tækniháskólann í Munchen. Hvernig má það vera að nálarstungu-lyfleysa (placebo) hafi sömu áhrif? Áhrifin eru greinilega andleg, og þá aðallega á skynjun einstaklingsins á sársauka og boðum frá líkamanum. Annað hvort platar sjúklingurinn sig alveg, eða að stungur geti leitt til þess að sársaukaboð fá þrálátum meinum fái lægri forgang í heilanum (þannig að viðkomandi haldi að sér líði betur!). Kínversku nálarstungukortin eru greinilega algert skýjaborg, eins og einkennandi er fyrir "hugmyndakerfi" óhefðbundina lækninga.

Ef nálastungur eru að plata heilann, þá er spurning hvort að þær hafi jákvæð áhrif þegar við (sem sjúklingar) höldum að þær séu að plata heilann?

Ítarefni

Ian Sample Even 'fake' acupuncture reduces the severity of headaches and migraines í the Guardian.

Flokkur: Vísindi og fræði | Breytt s.d. kl. 14:51 | Facebook

Athugasemdir

Langaði að benda þér á nýjasta cure all hæpið. Miracle mineral Supplement eða MMS, sem D. Humble nokkur er í forvari fyrir. Ég undrast alltaf þegar menn komast upp með svona loddaraskap í stórum stíl. Enn undarlegra er þó að smáskammtalækningar eða homopatía sé lögleg hér.

Flettu þessu upp og sjáður tröllauknar fullyrðingarnar. Læknar Aids á 4 dögum, malaríu, krabbamein...you name it. Minnir að síðan sé; www.miraclemineral.org

Jón Steinar Ragnarsson, 22.1.2009 kl. 00:02

Jón

Takk fyrir að benda okkur á töfralausnina. Ég var frekar efins til að byrja með en síðan sá ég mynd af uppfinningamanninum með tígrisdýr í bandi.

MMS mun lækna okkur af AIDS, blindu, gagnrýnni hugsun og fleiri meinum og löstum. Menn með tígrisdýr í bandi segja alltaf satt.

Arnar Pálsson, 22.1.2009 kl. 10:54

Ekkert að þakka. Verst að þetta gerir alla heilbrigðisstarfsmenn atvinnulausa og lokar öllum helstu rannsóknarverkefnum í læknisfræði, svo ég tali nú ekki um hrun lyfjaiðnaðarins. Tough luck. Oxyderað vatn og sítrónusafi. Ótrúlegt að engum hafi dottið þetta í hug fyrr.