Forskráning á líffræðiráðstefnuna

Ráðstefna um líffræðirannsóknir á Íslandi verður haldin 6. og 7. nóvember næstkomandi.

Nú hafa 103 erindi verið staðfest, 5 yfirlitserindi og 107 veggspjöld. Drög að dagskrá eru komin á vef Líffræðifélags Íslands og þar er einnig hægt að fá upplýsingar um greiðslu ráðstefnugjalda (mjög hófleg - 2000 kr/500 kr fyrir nemendur).

Ég mun á næstu dögum benda á nokkur erindi og verkefni sem gætu vakið áhuga fólks.

Fyrst langar mig til að minnast á erindi Ines Thiele, sem er hluti af nýstofnuðu kerfislíffræðisetri við HÍ. Hún er að rannsaka efnaskiptakerfi fruma. Nýlega birti hún grein í Science ásamt Bernharði Pálssyni, og öðrum samstarfsmönnum. Sú rannsókn fjallaði um greiningu á byggingu allra ensíma einfaldrar bakteríu Thermatoga, og samþættingu við upplýsingar um efnaskiptagetu þeirrar lífveru.

Ines fjallar um rannsóknir sínar í erindi eftir hádegi þann 6. nóvember.