1000 áhugaverðir áfangar í HÍ

Æskan er uppreisn. Þegar maður skilur barndóminn eftir og gengur í gegnum kynþroska vill maður sjálfstæði. Það er eðlilegt að vilja brjótast undan áhrifum foreldra og ættar, leita á vit ævintýra og prufa eitthvað nýtt.

Maður vill líka fá eitthvað að borða og forðast fátækt. Þroskaðir einstaklingar sýna ábyrgð og tryggja framtíð sína með góðri menntun.

Margir mæta í framhaldsskóla eða háskóla sundurteygðir af þessum kröftum, uppreisnaranda og fyrirhyggju.

Háskólanám er ekki hannað til að skemmta eða svala forvitni sveimhugans. Það er byggt upp til að vera annað hvort fræðilega sterkt eða hagnýtt; stundum hvorutveggja í senn. Námskeið eru ekki sett saman til að vera áhugaverð eða skemmtileg, heldur af því að þau eru álitin nauðsynleg til að mennta t.d. jarðfræðing eða lífeindafræðing.

Auðvitað skiptir máli hvernig námskeið eru uppbyggð og hvernig þau eru kennd. Ef kennarar hafa áhuga á viðfangsefni, getur það skipt sköpum fyrir upplifun nemenda og kveikt í þeim áhuga. Einnig er hægt að skipuleggja námsefni þannig að það myndi góða heild, sem geti bæði örvað og skemmt nemendum. 

Staðreynd málsins er að í hverri námsbraut eru tugir námskeiða, sem hvert um sig gegnir ákveðnu hlutverki. Hlutverkið er e.t.v. ekki ljóst nemendum á fyrsta ári en oftast verður það ljóst á þriðja ári. Námskeiðin mynda heildstæða menntun, sem gefur viðkomandi sterkan grunn á vissu fræðasviði og þjálfun í að lesa, skilja og endursegja það sem mestu máli skiptir í vissu fagi.
Þar að auki eru í boði valnámskeið, sem endurspegla að miklu leyti sérsvið kennara við deildir HÍ. (bætt við eftir athugasemd frá Bjarna)

Monitor setti saman lista yfir 10 áhugaverða áfanga í HÍ. Reyndar virka sumir þeirra örlítið athyglisverðir, fyrir mig sérstaklega myndasögur Úlfhildar Dagsdóttur (skora á fólk að lesa bók hennar um Sæborgina). En ég vil samt brýna fyrir nýjum nemendum að nám er ekki bara skemmtun, því fylgir örlítil alvara.

Þess vegna myndi ég aldrei skipta Frumulíffræði II út fyrir Vampír­ur, enda nóg af þeim í Dýrafræði II.

Mynd af tjáningu gena í flugufóstrum, Lott o.fl. 2007.

Ítarefni:

Frumulíffræði II

Hræðilegt ástand fjölmiðla í íslenskri sæborg

Svalur á milli góðra bóka

10 áhugaverðir áfangar í HÍ

Athugasemdir

[Bjarni Kristófer (IP-tala skráð) 24.8.2014 kl. 08:30]

"Staðreynd málsins er að í hverri námsbraut eru tugir námskeiða, sem hvert um sig gegnir ákveðnu hlutverki. Hlutverkið er e.t.v. ekki ljóst nemendum á fyrsta ári en oftast verður það ljóst á þriðja ári." Stundum held ég að það sé nú engum ljóst hvert sé hlutverk ákveðinna námskeiða innan ákveðinna námsbrauta. Þau eru þar inni vegna áhuga einstakra kennara um að kenna "sitt" fag og/eða hafa "alltaf" verið þarna.

[Arnar Pálsson, 25.8.2014 kl. 09:00]

Takk Bjarni

Það er sannarlega rétt hjá þér að framboð námskeiða endurspeglar að vissu leyti samsetningu kennaraliðs og sögu deilda og námsbrauta.

Þetta var sérstaklega augljóst fyrri hluta síðustu aldar, þegar uppbygging háskólanám var einstaklega niðurnjörvuð og fáar breytingar urðu.

Nú til dags er meiri breytingum háð. Við í líffræðinni breyttum t.d. fyrir nokkrum árum samsetningu námskeiða og innihaldi, þótt sannarlega hafi ekki verið um allsherjar uppskurð að ræða.

Það er þörf á vissri heildarsýn, sem er best að spretti upp úr samræðu kennara í hverri námsbraut eða á mörkum námsbrauta.

Háskólanám breytist en aðrir hlutir. Hlutverk okkar sem háskólafólks og kennara er að tryggja að námið sé heilstætt, fræðilega sterkt og undirbúi nemendur vel fyrir áskoranir framtíðar. 

[Arnar Pálsson, 25.8.2014 kl. 09:01]

Leiðrétting

"Háskólanám breytist eins og annað."