Menntamálaráðuneyti sveltir fagfélög

Mennta- og menningarmálaráðuneyti tilkynnti nýlega breytingar á úthlutun fjármagns til fagfélaga. Styrkir verða í framtíðinni aðeins veittir í sérstök verkefni sem eru ráðuneytinu þóknanleg eða í samræmi við stefnu þess.

Merkilegt er að frjálslyndi flokkurinn skuli standa fyrir slíkri forræðishyggju og stjórnræði. Fagfélög hafa stundað margþætt og lifandi starf, sem nærir fagstéttir kennara um allt land og skilar sér þannig í betri og upplýstari kennarastétt og vandaðari kennslu.

Að þessu tilefni sendi stjórn samtaka líffræðikennara frá sér bréf til ráðherra þar sem þessum fyrirætlunum er mótmælt. Bréfið birtist hér í heild sinni.

---

Reykjavík, 1. desember 2015
Til: Mennta- og menningarmálaráðherra
Efni: Rekstrarstyrkir til faggreinafélaga, MMR15090148

Í bréfi frá mennta- og menningarmálaráðuneytinu dagsettu 15. september 2015 segir

„Vakin er athygli á því að ráðuneytið hefur ákveðið að breyta verklagi við veitingu styrkjanna þannig að í framtíðinni verða þeir einungis veittir fyrir verkefni sem fagfélög eru fengin til að vinna fyrir ráðuneytið. t.d. til að fylgja eftir stefnu ráðuneytisins og forgangssviðmiðum.”

Samlíf, samtök líffræðikennara hvetja mennta- og menningarmálaráðherra eindregið til þess að endurskoða þessa ákvörðun. Með þessari breytingu er faglegu sjálfstæði kippt undan faggreinafélögum auk þess sem þátttaka kennara af landsbyggðinni í stjórnarstarfi faggreinafélaganna er útilokuð.

Um leið og Samlíf þakkar fyrri styrki, gott samstaf og ítrekar að stjórnarmeðlimir og félagsfólk sé áfram tilbúið að vinna þau verkefni sem ráðuneytið kallar eftir teljum við mikilvægt að rekstrarstyrkir séu áfram veittir.

Árlegur styrkur til faggreinafélaga hefur verið 150.000 kr. undanfarin ár, hafði þá verið skorinn niður úr 800.000 kr. (var um tvenn mánaðarlaun kennara á ári) svo nú þegar er búið að setja starfsemi faggreinafélagins ansi þröngan stakk.
Rekstrarstyrkurinn hefur verið notaður til almenns rekstrar fag-félagsins eins og rekstrarskýrslur sem berast til ráðuneytis árlega sýna. Félagið er sameiningatákn líffræðikennara á öllum skólastigum, félagsfólk er frá leikskólum til háskóla. Félagið kemur að umræðu um kennslu í líffræði, heldur fundi um námskrárvinnu, námsefnisgerð, heldur úti heimasíðu og sendir árleg fréttabréf svo það helsta sé nefnt.
Stjórnarfólk starfar allt í sjálfboðavinnu.

Faggreinafélög hafa borgað ferðastyrki samkvæmt töxtum KÍ fyrir þá framhaldsskólakennara sem starfa fyrir félagið og búa utan höfuðborgar-svæðisins. Með niðurfellingu rekstrarstyrkja er þátttaka þessa hóps úti-lokuð.

Faggreinafélögin þurfa að hafa fjárhagslegt svigrúm til þess að vinna sem gagnrýnir og sjálfstæðir fagaðilar. Fagfélög hafa lagt sig fram um að eiga gott samstarf við yfirvöld menntamála um málefni sem á hverjum tíma þarfnast umræðu, faglegrar rýni og úrvinnslu.

Með bréfi þessu fer stjórn Samlífs fram á að ráðuneytið endurskoði ákvörðun sína varðandi styrkveitingar til faggreinafélaga og hækki styrkinn frekar en leggja hann niður.

Fyrir hönd stjórna Samlíf

Hólmfríður Sigþórsdóttir formaður

Stjörnur dýraríksins á ystu nöf

Nýlegar rannsóknir á spendýrum, fuglum og öðrum tegundum sýna að margar tegundir nálgast nú hættusvæðið eða eru í hættu á að deyja út. Teikn hafa verið á lofti í marga áratugi, en gróðureyðing, skógarhögg og eyðilegging búsvæða veldur því að enn syrtir í álinn.

Rúv var með vandaða fréttaskýringu um þetta mál nýlega - fréttamaðurinn Tryggvi Aðalbjörnsson á hrós skilið. Hér er upphaf umfjöllunar hans.

Stjörnur dýraríkisins á hverfanda hveli

Framtíð margra þekktustu spendýrategunda jarðar er ekki björt vegna síaukins átroðnings mannsins um allan heim. Meiriháttar útrýming gæti verið í aðsigi. Allir frændur mannsins af ætt mannapa eru í útrýmingarhættu, svo og tígrisdýr, nashyrningar, kameldýr, steypireyðar og fjölmargar aðrar tegundir. Fimmta hver spendýrategund í heiminum er komin á alþjóðlegan válista.

Óttast meiriháttar útrýmingu

Fjórir milljarðar tegunda lífvera hafa þróast á jörðinni á síðustu 3,5 milljörðum ára. Um 99% eru útdauðar. Fyrir 65 milljónum ára dóu 75% dýra- og plöntutegunda í heiminum út á tiltölulega skömmum tíma. Talið er að smástirni eða halastjarna hafi rekist á jörðina og þeytt upp gríðarmiklu ryki sem skyggði á sólarljósið með hörmulegum afleiðingum fyrir flestar lífverur. Meðal tegunda sem þá dóu út voru allar tegundir risaeðla, að forfeðrum fugla undanskildum.

Fimm sinnum í sögu jarðar hafa orðið slíkar hamfarir, af völdum árekstra úr geimnum, risaeldgosa, loftslagsbreytinga og annarra þátta, sem leitt hafa til útrýmingar meirihluta lífs á hnettinum. Nú óttast vísindamenn að sjötta fjöldaútrýmingin sé hafin. Ástæður hennar séu þó allt aðrar - maðurinn.

Anthony Barnosky, fornlíffræðingur við Kaliforníuháskóla, spáir því að eftir um 300 ár verði 75% allra spendýrategunda horfnar, það er að segja ef þær halda áfram að deyja út á sama hraða og nú, og ef allar tegundir sem nú eru á válista verða útdauðar eftir 100 ár.

Framhald greinarinnar má lesa á vef RÚV.

Mynd af tígrisdýri tók Arnar Pálsson í East Lansing Zoo 2014.

Loftslagsganga á sunnudaginn

Loftslagsganga á sunnudaginn - ákall frá Hinu íslenska náttúrufræðifélagi.

Þann 29. nóvember ætlar almenningur um heim allan að flykkjast út á götu og krefjast aðgerða í loftslagsmálum fyrir fund Sameinuðu þjóðanna í París í byrjun desember, en markmið fundarins er að þjóðir heimsins nái bindandi samkomulagi um samdrátt á losun gróðurhúsalofttegunda. Við ætlum líka að láta í okkur heyra, endurtaka leikinn frá því í fyrra og ganga Loftslagsgöngu í Reykjavík.

Við viljum undirstrika þá kröfu að Ísland axli ábyrgð sína í loftslagsmálum, dragi úr losun gróðurhúsalofttegunda og hætti við öll áform um olíuvinnslu á Drekasvæðinu.Um er að ræða alheimsviðburð því sams konar göngur munu fara fram í París, New York, Kaupmannahöfn, London, Róm, Tokyo, Berlín, Jóhannesarborg, Nýju Dehli, Melbourne og fjölda annarra borga um heim allan. Búist er við að viðburðurinn í ár verði jafnvel stærri en viðburðurinn í september í fyrra, en hann var sá stærsti tengdur loftslagsmálum í sögunni.

Safnast verður saman klukkan 14:00 á svo kölluðu „Drekasvæði“ sem staðsett er á horni Kárastígs, Frakkastígs og Njálsgötu, þaðan sem gengið verður til kröfufundar á Lækjartorgi. Skýrsluhöfundar IPCC (Intergovernmental Panel on Climate Change) hafa tekið af öll tvímæli um að verði haldið áfram á sömu braut muni öfgar í veðri valda miklum hörmungum um víða veröld, hvort sem er í formi þurrka, hitabylgna eða æ ofsafengnari fárviðra. Einnig gæti yfirborð sjávar hækkað um allt að einn metra fyrir næstu aldamót og heimshöfin súrna hratt vegna síaukinnar losunar koltvísýrings út í andrúmsloftið. Súrnun sjávar mun líklega hafa graf alvarlegar afleiðingar fyrir Ísland sem fiskveiðiþjóð, rétt eins og hækkun yfirborðs sjávar ógnar framtíð þeirra þjóða sem byggja láglendar eyjar í Kyrrahafi.

Eina leiðin til að minnka skaðann er að draga verulega úr losun gróðurhúsalofttegunda á komandi árum. Krafa loftslagsgöngunnar er er að stjórnvöld axli ábyrgð, virði skuldbindingar landsins um samdrátt í losun gróðurhúsalofttegunda og taki undir ítrustu kröfur um frekari samdrátt á vettvangi Evrópusambandsins og Sameinuðu þjóðanna. Ennfremur að Ísland setji sér metnaðarfull markmið um samdrátt gróðurhúsaloftteguna til að kröfur um aðgerðir verði trúverðugar. Ríkisstjórn Íslands ber að taka undir málflutning Filipseyja og eyríkja sem mest er ógnað af völdum loftslagsbreytinga. Ennfremur er þess krafist, þar sem við horfum fram á óhjákvæmilegar afleiðingar útblásturs gróðurhúsalofttegunda á undanförnum 150 árum, að stjórnvöld hafi víðtækt samráð við almenning jafnt sem fyrirtæki og stofnanir um vinnu að aðgerðaáætlun um hvernig best sé að bregðast við breyttu loftslagi, breytingum á lífkerfi sjávar og viðbúnum auknum straumi flóttafólks.

Mætum og látum í okkur heyra!

Gagn af menntun - erlendis

Snemma á námsárunum fæddist sú hugmynd að fara utan í framhaldsnám. Þá stundaði ég rannsóknir á líffræðistofnun Háskólans, sem voru svo dásamlega skemmtilegar og gefandi að hugurinn þyrsti í meira.

Úr varð að ég fór til Norður Karólínu í doktorsnám í erfðafræði, og sé svo sannarlega ekki eftir því. Menntun erlendis er góður skóli fyrir einstaklinga, sama hvort þeir eru í fræðilegu eða hagnýtu námi.

Ég varla orð til að lýsa því hversu mikilvægur námstíminn erlendis var. Fyrirfram hafði maður allskonar ranghugmyndir um BNA, sem tvístruðust við nánari skoðun. Einnig er það ákaflega mikilvægt ungu fólki að fá að spjara sig á eigin fótum. Að síðustu, var það mér lífsnauðsynlegt sem fræðimanni að sækja frekari menntun ytra, og ekki skaðaði að vinna við afburða stofnanir (Fylkisháskólann í Norður Karólínu og háskólann í Chicago). Vísindin sem ég fæst við spruttu úr samstarfi og samneyti við allskonar fólk við þessa háskóla, háskólar eru yndislegir suðupottar framsækinna hugmynda.

Robert Barber sendiherra Bandaríkjanna hérlendis fjallar um nauðsyn þess að fara utan í nám eða framhaldsnám í grein í Fréttablaðinu. Hann segir m.a.

Sambönd sem verða til og þróast með alþjóðlegri menntun eru varanleg og endast alla ævina. Alþjóðlegir nemendur auðga kennslustofur, háskólasvæði og samfélög hýsilanda sinna á máta sem heldur áfram löngu eftir að nemendurnir hafa snúið aftur til heimalanda sinna. Þeir þróa með sér skilning á gildum og sjónarmiðum fólksins í hýsilöndum sínum, sem þeir hafa í huga það sem eftir lifir lífs þeirra.

Alþjóðleg menntun og efnahagslífið
Þegar snúið er heim eftir dvöl erlendis nýtur heimaland alþjóðlega nemandans góðs af reynslu hans, þekkingu og fenginni færni; sömu færni og nauðsynleg er til að stunda samkeppni í hinu hnattvædda hagkerfi nútímans. Tenging landa með alþjóðlegri menntun stuðlar að opnun markaða og auknum viðskiptum. Sem sendiherra Bandaríkjanna á Íslandi hef ég gert það að persónulegu markmiði mínu að auka viðskiptatengsl á milli landa okkar tveggja. Ég tel að sú reynsla sem fengin er með menntun í Bandaríkjunum veiti sterkari grunn sem bæði lönd geta notið góðs af.

Auðvitað er sendiherrann að vekja áhuga íslenskra nemenda á framhaldsnámi erlendis, en hann bendir líka á að fleiri Bandaríkjamenn sækja nú í nám í Evrópu.

Viðleitni mín á Íslandi er ekki takmörkuð við að senda fleiri Íslendinga til náms í Bandaríkjunum. Bandaríska utanríkisráðuneytið hvetur fleiri bandaríska nemendur til að íhuga nám erlendis. Ég trúi því að þessi viðleitni sé að virka. Fleiri nemendur, en nokkru sinni fyrr, horfa nú til Íslands sem lands menntunar – hvort sem um er að ræða grunnnám, framhaldsnám eða jafnvel sumarnám. Það hvetur mig til dáða að sjá hvernig þau koma fram fyrir land sitt og segi ég þeim öllum að hann eða hún, eins og ég, eru sendiherrar Bandaríkjanna á meðan þau stunda nám hér.

Og auðvitað felur það í sér að allir íslenskir námsmenn eru vitanlega sendiherrar Íslands út á við. Það eru forréttindi að tilheyra þessari fámennu og sérstöku þjóð, en þeim fylgja líka skyldur. En skyldur okkar sem námsmanna og manneskja eru einnig við þekkinguna og leitina að henni. Tendrum forvitnina, efumst og gagnrýnum, spyrjum spurninga, leitum svara og gefumst ekki upp.

Með öðrum orðum, köstum okkur í suðupottana og hrærum saman nýstárlegar hugmyndir.

Frá skarði í væng ávaxtaflugunnar til krabbameinslyfja

Laugardaginn 14. nóvember kl 14-16 munu Samtök um Krabbameinsrannsóknir á Íslandi, SKÍ, fagna 20 ára afmæli sínu með opnu húsi í Iðnó.

Allir eru velkomnir til að fræðast um krabbameinsrannsóknir og fagna með félaginu.

Dagskrá:

Ávarp formanns SKÍ - Margrét Helga Ögmundsdóttir

Örerindi kl. 14.15 - 15.15:

Stofnun Samtaka um krabbameinsrannsóknir á Íslandi

Helga M. Ögmundsdóttir - Prófessor við Læknadeild HÍ

Hvað er Krabbameinsskráin og hvernig er hægt að nota hana?

Laufey Tryggvadóttir - Framkvæmdastjóri Krabbameinsskrár

Frá skarði í væng ávaxtaflugunnar til krabbameinslyfja

Eiríkur Steingrímsson - Prófessor við Læknadeild HÍ

Rannsóknir í krabbameinshjúkrun

Sigríður Gunnarsdóttir - Framkvæmdastjóri hjúkrunar á Landspítala

Læknisfræðirannsóknir í krabbameinsfræðum

Magnús Karl Magnússon - Forseti Læknadeildar HÍ

Samtakamáttur

Gunnhildur Óskarsdóttir - Formaður styrktarfélagsins Göngum saman

 

Veggspjöld þar sem vísindamenn kynna rannsóknir sínar

Kaffi og kökur í boði - Allir velkomnir!

 

Sigurför flugnagildrunar

Bækur eru dásamleg fyrirbæri, sem næra okkur og róa, gleypa og hræra, stuða og espa.

Það saman má segja um flugur, sérstaklega ávaxtaflugur.

Allavega finnast mér flugur flestum dýrum fremri, og í gegnum tíðina hafa þær verið mér uppspretta gleði og innblásturs, nýrrar þekkingar og vinskapar. (Á myndinni sést ávaxtafluga á væng fiðrildis).

En hví að þusa um ávaxtaflugur á þriðjudegi? Í Víðsjá gærdagsins var fjallað um Flugnagildruna, bók eftir sænskan líffræðing sem gefin er út fyrir jólin. Rætt var við Sigrún Ástríður Eiríksdóttir þýðanda bókarinnar. Af vef RÚV.

------------------

Af flugum

Ef maður getur skrifað áhugaverða bók um flugur, ætli maður geti þá ekki skrifað um hvað sem er? Sænska rithöfundinum og líffræðingnum Fredrik Sjöberg tókst að skrifa áhugaverða bók um flugur, að minnsta kosti hefur hún slegið í gegn víða um heim. Flugnagildran kom fyrst út fyrir ríflega tíu árum, en hefur farið sigurför um heiminn á síðustu misserum, verið þýdd á fjölda tungumála og verðlaunuð í mörgum flokkum.

Hverskonar bók? 

Flugnagildran, þetta er bók um skordýrafræði. Sögumaðurinn hefur komið sér fyrir á eyju í sænska skerjagarðinum, þar sem hann fylgist með flugum, og rifjar upp sögu manns að nafni  René Malaise, sem ku hafa fundið upp einhverja mögnuðustu flugnagildru sem um getur. Margar fleiri sögur koma við sögu í þessari bók, sem líkist kannski ritgerð fremur en skáldsögu, er kannski einhvers konar essay-roman. ,,Á jörðinni okkar eru margar milljónir tegundir af skordýrum,“ segir á einum stað í þessari bók: og já í henni koma við sögu ,,húsflugur, bredduflugur, ránflugur, sveifflugur, hausflugur, herflugur, knattflugur, skartflugur, bananaflugur, hræflugur, maðkaflugur, stingflugur, kryppuflugur, hveraflugur, lúsflugur, mykjuflugur, stinkflugur“, (47-48), og þannig mætti lengi áfram telja. Já, hér koma flugur við sögu, en líka náttúruvísindamenn frá mörgum tímum, sagt er frá rannsóknum á mjög sérhæfðu sviði flugnafræða, jú og rithöfundar á borð við August Strindberg, D. H. Lawrence og Bruce Chatwin, svo nokkrir séu nefndir, skjóta upp kollinum í afar sérstæðum vef þessa verks.

Tíu ára ferill 

Útgefandi Sjöbergs bjóst á sínum tíma við því að selja um það bil 16oo eintök af Flugnagildrunni á fimm árum, en raunin varð önnur, bókin seldist í 30 þúsund eintökum í Svíþjóð einni og í þúsundavís í Frakklandi, Þýskalandi, Rússlandi og Noregi. Bókin kom út í Englandi, Ítalíu og Spáni í fyrra, í Bandaríkjunum fyrr á þessu ári. Það hefur sumsé tekið tíma að koma þessari bók áleiðis, enda erfitt að staðsetja hana: er þetta náttúrusaga, vísindi fyrir almenning, sjálfsævisaga nú eða hrein ljóðlist? Breska bókmenntatímaritið Times Literary Supplement valdi bókina eina af bókum ársins; þar spurðu menn einfaldlega: ,,Hverjum hefði dottið í hug að lítil bók um skordýrafræði yrði metsölubók um alla Evrópu? (...) en skordýr koma málinu nánast ekkert við; þetta er í raun og veru bók um tilgang lífsins.“

Erfðagallar sem afhjúpast við breytingar á lífstíl

Á líffræðiráðstefnunni 5. til 7. nóvember kennir margra grasa og gena.

Greg Gibson heldur yfirlitserindi um samspil erfða og umhverfis.

Margir kvillar og sjúkdómar er arfgengir, að einhverju leyti amk. En getur verið að gen sem voru meinlaus fyrir 1000 árum séu allt í einu orðin skaðleg? Greg Gibson hefur rannsakað hvernig breytingar á umhverfi hafa ahjúpað erfðaþætti sem ýta undir sjúkdóma.

Greg starfar við tækniháskólann í Georgíu og vinnur að rannsóknum á mannerfðafræði. Samspil gena í ólíkum ferlum og kerfum líkamans er oft ansi flókið og ófyrirsjáanlegt. Gögn benda til þess að aukin tíðni algengra erfðasjúkdóma eigi sér rætur í samspili gena og umhverfis. Hröð þróun vissra gena mannsins og miklar breytingar á umhverfi okkar síðustu kynslóðir gæti hafa afhjúpað dulin erfðabreytileika, sem hafa áhrif á líkurnar á algengum sjúkdómum.

Gibson er þroskunarerfðafræðingur sem hefur einbeitt sér að rannsaka eðli og orsakir breytileika í svipfari. Hann hefur lagt sérstaka áherslu á að kanna hulin erfðabreytileika, sem birtist bara við ýktar umhverfisaðstæður eða þegar alvarlega stökkbreytingar finnast í einstaklingum. Helstu uppgötvanir hans eru.

• Algengir erfðasjúkdómar eru að stórum hluta tilkomnir vegna breytinga á umhverfi manna síðustu aldir.
• Erfðabreytileiki getur verið hulinn við einar aðstæður – en afhjúpast við aðrar.
• Breytileiki í genatjáningu í blóði er undir sterkari áhrifum umhverfis en gena.
• Þekking á breytileika í genatjáningu og frumum getur hjálpað okkur að nýta erfðaupplýsingar í meðhöndlun einstaklinga.

Á myndinn hér fyrir neðan sjást áhrif stökkbreytingar á væng ávaxtaflugunar (mynd Ian Dworkin, birt með leyfi). Vinstra meginn er eðlilegur vængur. Í miðjunni og hægra meginn eru vængir flugna af tveimur stofnum, sem báðir eru með sama erfðagallann. Galli í einu geni hefur því alvarleg áhrif einum stofni (í miðjunni) en mun vægari áhrif í öðrum. Eiginleikar flugna og okkar eru því afleiðing samspils breytileika í mörgum erfðaþáttum og auðvitað margra umhverfisþátta. Hver sagði að líffræði væri einföld?

Doktorsverkefni mitt var unnið undir leiðsögn Gibsons, þegar hann starfaði við fylkisháskólann í Norður Karólínu. Þá fundum við erfðaþátt sem tengdist breytingum á lögun vængs ávaxtaflugunar. Í öðru verkefni sem við unnum að fundum við einnig að hulin breytileika í tilteknu þroskunargeni sem hefur áhrif á bæði vængi og augu flugunar.

Fimm aðrir vísindamenn halda öndvegiserindi á líffræðiráðstefnunni.

Mina Bissell – Lawrence Berkeley National Laboratory – Why don’t we get more cancer?  The crucial role of Extracellular Matrix and Microenvironment in metastasis and dormancy

• Robert Hindges – MRC Centre for Developmental Neurobiology  – How do we see the world: Mechanisms to establish specific circuits in the vertebrate retina
• Steven E. Campana – Marine Academic Research in Iceland, University of Iceland – Adventures in the Arctic: First steps towards a pan-Arctic conservation strategy for lake trout
• Brynhildur Davidsdottir – Program for Environment and Natural Resources, University of Iceland – Environmental sustainability in Iceland; the role of biology
• Snorri Baldursson – Head of Landvernd (Icelandic nature preservation society) – Náttúruvernd á krossgötum

Málstofa um sauðfjárbeit

Á líffræðiráðstefnunni 2015 kennir margra grasa. Líka grasa sem kindur kunna að meta. Það er gaman að kunngjöra að ein málstofa fjallar um sauðfjárbeit, skipulögð af Ingibjörgu S. Jónsdóttur og Isabel C. Barrio. Í kjölfar hennar er skipulag hringborð, þar sem fjallað verður um þrjár lykilspurningar (sjá neðar).

Málstofa um sauðfjárbeit / Session on sheep grazing

Föstudaginn 6. Nóvember kl. 16:25-19:00, Askja N-131

Fundarstjóri / Chair: Isabel C. Barrio

16:25-16:40     The ecological role of large vertebrate grazers in high-latitude ecosystems – is it different between livestock and wild populations? – Ingibjörg Svala Jónsdóttir, Isabel C. Barrio

16:40-16:55     Historical impact of grazing in Kjarardalur, West Iceland – Egill Erlendsson

16:55-17:10     Plant diversity in Icelandic tundra – no evidence for an effect even 60 years after cessation of sheep grazing – Martin A. Mörsdorf

17:20-17:35     Ástand lands, beit og mælanlegir vistkerfisþætti  – Ólafur Arnalds

17:35-17:50     Tengsl átgetu og þrifa sauðfjár við ástand gróðurs og beitarálag – Sigþrúður Jónsdóttir

17:50-18:00     Hlé / break

18:00-19:00     Hringborðsumræður / Roundtable discussions

 

Þátttakendur /Participants

Björn H. Barkarson, umhverfisráðuneytið

Egill Erlendsson, HÍ

Jóhann Þórsson, Landgræðsla ríkisins

Oddný Steina Valsdóttir, Landssamband sauðfjárbænda

Ólafur Arnalds, Landbúnaðarháskóli Íslands

Þór Kárason, bóndi

Þóra Ellen Þórhallsdóttir, HÍ

Þórólfur Matthíasson, HÍ

Þórunn Pétursdóttir, Landgræðsla ríkisins

Ingibjörg Svala Jónsdóttir, mun stjórna umræðunum.

Skipulag umræðnanna (English below)

Þrjár megin spurningar verða til umræðu, ein eftir aðra, og fær hver þátttakandi 1,5-2 mínútur til að svara hverri þeirra. Eftir það munum við opna fyrir breiðari umræum með þátttöku almennra áheyrenda.  Umræðurnar munu fara fram á íslensku en þar sem búist er við að margir áheyrenda séu ekki mælandi á íslensku munum við reyna draga það helsta saman á ensku inn á milli.

Spurningarnar eru:

Hver telur þú helstu viðfangsefnin varðandi sauðfjárbeit á Íslandi í dag?
Hvaða rannsóknir tengdar sauðfjárbeit telur þú mest aðkallandi á Íslandi?
Hverjar væru þínar helstu ráðleggingar fyrir sjálfbæra sauðfjárbeit á Íslandi?

Auk erinda og hringborðsumræðna verða eftirfarandi veggspjöld kynnt

V16     Ása L. Aradóttir – Breytingar á gróðurfari í kjölfar sauðfjárbeitar á lúpínubreiður

V17     Jóhann Þórsson – Samspil beitar og umhverfis

V18     Bryndís Marteinsdóttir – Lítil sauðfjárbeit á lítt grónu landi – hefur hún áhrif á sjálfgræðslu lands?

————- English —————————

Organization of the roundtable

Three overarching questions will be discussed one after another and each participant will get 1.5-2 minutes to answer each of them. After all participants have answered a round of questions we will open the topic for broader discussion with comments and questions from the audience. The discussion will be in Icelandic but will be summarized in English in between.

The questions:

    In your view, what are the main issues associated with sheep grazing in Iceland?
    What do you think are the most urgent research areas related to sheep grazing in Iceland?
    What would be your recommendation for sustainable sheep grazing in Iceland?

Vísindadagur í Öskju 31. október

Vísindadagur Verkfræði- og náttúruvísindasviðs Háskóla Íslands verður haldinn laugardaginn 31. október næstkomandi. Milli klukkan 12 og 16 verður slegið upp vísindaveislu í Öskju, náttúrufræðahúsi Háskóla Íslands, þar sem vísindamenn sviðsins segja frá rannsóknum og fræða gesti og gangandi um undraheim vísindanna. Þema Vísindadags 2015 er ljós í tilefni af Alþjóðlegu ári ljóssins.

 

 

Sprengjugengið og Vísindasmiðjan verða með sýnitilraunir fyrir alla aldurshópa og stjörnutjaldið verður með átta sýningar yfir daginn þar sem hægt er að ferðast um undur alheimsins. Einnig verða óvæntar uppákomur í tilefni Hrekkjavöku.

 

Ég bendi fólki sérstaklega á fjögur líffræðileg erindi sem verða á dagskrá.

13:15   Edda Elísabet Magnúsdóttir  - Sjávarspendýr í hávaðasömum höfum: Versnandi aðstæður á Norðurslóðum

13:30   Sigríður Rut Franzdóttir - Ljómandi líf

15:15   Einar Árnason - Colonization of Glacier Ice by Microinverebrate Bdelloid Rotifera

15:30   Pétur Halldórsson - Himbrimarannsókn á Íslandi (Gavia immer)

 

http://visindadagur.hi.is/visindadagur_2015

Hví fáum við ekki fleiri krabbamein ?

Mina J. Bissell mun halda opnunarerindi Líffræðiráðstefnunar 2015, þann 5. nóv kl 16:00. Erindið nefnist Why don’t we get more cancer?  The crucial role of Extracellular Matrix and Microenvironment in metastasis and dormancy. Erindið er styrkt af Lífvísindasetri Háskólans, og er öllum heimill aðgangur.

Mina starfar við Lawrence Berkeley National Laboratory í BNA. Dr. Mina Bissell er einn af virtustu vísindamönnum heims á sviði krabbameinsrannsókna. Hún hefur helgað líf sitt brjóstakrabbameinsrannsóknum og þá sérstaklega rannsóknum á hlutverki millifrumuefnis í þroskun og sérhæfingu eðlilegra og illkynja brjóstþekjufruma.  Rannsóknir dr. Bissell hafa leitt í ljós að mikilvægt er að hugsa um heildarmynd vefja og æxla og að framþróun æxlisvaxtar og meinvarpamyndunar er háð því hvernig umhverfi fruma er. Í fyrirlestri sínum mun dr Bissell fara yfir rannsóknir sínar og spyrja þeirrar spurningar af hverju fáum við ekki oftar krabbamein. Um feril og rannsóknir dr. Bissell má fræðast á vefsíðu Lawrence Berkeley National Laboratory.

Árið 2012 hélt hún stórfínann TED fyrirlestur.

Ritalista Minu má sjá á vefsíðu rannsóknarhóps hennar.